A Revolta, a medieval podcast é un proxecto de divulgación histórica que emprega o formato de programa radiofónico contemporáneo para achegar ao público a historia do Reino medieval de Galicia dun xeito ameno, rigoroso e accesible.

A través de cinco episodios duns vinte minutos de duración, o podcast presenta diferentes figuras históricas vinculadas ao Reino de Galicia, combinando entrevistas ficticias, faladoiros, boletíns informativos, seccións de actualidade, publicidade e outros recursos narrativos inspirados nos medios de comunicación actuais.

Cada episodio céntrase nun personaxe histórico concreto: a raíña Urraca, Fernán Díaz, Diego Xelmírez, María Balteira e Fernando I de Portugal. O obxectivo non é construír simples biografías, senón utilizar estas figuras como punto de partida para abordar cuestións históricas máis amplas relacionadas co poder, o papel das mulleres, a diversidade sexual, a literatura medieval, a lingua galegoportuguesa, as relacións entre Galicia e Portugal ou os conflitos sociais e políticos da época. Deste xeito, o proxecto procura ofrecer unha visión plural e actualizada da historia medieval galega, incorporando enfoques contemporáneos como a perspectiva de xénero ou a historia das minorías.

A iniciativa compleméntase cunha estratexia de difusión en redes sociais e en feiras medievais, buscando chegar a públicos afastados do ámbito académico. O resultado é unha proposta divulgativa que combina investigación historiográfica, creatividade narrativa e comunicación dixital para contribuír á difusión social do Reino de Galicia e das súas figuras máis relevantes.