A Guía Visual do Reino Medieval de Galiza é unha proposta editorial que ten como obxectivo achegar de maneira accesible, atractiva e rigorosa a historia do Reino de Galiza ao público xeral, especialmente á mocidade e ao ámbito escolar.
Trátase dun libro ilustrado que combina textos sinxelos con mapas, fotografías e ilustracións para construír un percorrido completo polo período medieval galego, desde o Reino Suevo ata o decreto de 1833 que supuxo a súa desaparición administrativa.
A obra está estruturada por bloques temáticos que permiten coñecer a evolución histórica, territorial, política, cultural e social do Reino de Galiza, abordando cuestións como:
- As orixes do reino e a súa evolución histórica.
- A configuración do territorio e as divisións que levaron ao nacemento de Portugal.
- As dinastías e reis galegos.
- A vida cotiá: economía, comercio, urbanismo, comunidades xudías, revoltas irmandiñas…
- A importancia da lingua e da literatura galego-portuguesa.
- O papel da Igrexa e a relevancia do mito xacobeo.
- As relacións internacionais e a presenza de Galiza no imaxinario medieval europeo.
Inclúe tamén seccións destacadas como:
- Unha liña do tempo visual cos principais acontecementos e reinados.
- Dez figuras ou feitos clave da historia medieval galega.
- Unha proposta de 10 lugares que visitar relacionados con esta etapa.
- Unha escolma de mapamundis e cartografías medievais onde aparece Galiza.
- Recomendacións bibliográficas para afondar no tema.
Con esta guía visual, preséntase un recurso divulgativo innovador e de calidade, pensado como ferramenta educativa e tamén como proposta turística-cultural, que permite recuperar e visibilizar unha das etapas máis fascinantes e descoñecidas da nosa historia.
