Proxecto de animación 3D que achega a historia de Galicia ao público infantil dunha maneira amena e divertida.

Inspirado no espírito divulgativo de Érase una vez… el hombre, pero cun enfoque máis dinámico e inmersivo, segue as aventuras de Uxía e Brais, dous irmáns que, xunto ao seu avó, viaxan no tempo grazas a un libro máxico.

O obxectivo inmediato do proxecto foi a creación dun teaser de 5-6 minutos centrado na Gran Revolta Irmandiña de 1467, no que os protagonistas foron testemuñas do asalto ao castelo de Vimianzo.

A idea foi que a curta teña unha entidade propia e poida proxectarse en colexios, salóns do libro ou eventos culturais, ademais de servir como carta de presentación para institucións, concellos e empresas privadas.

O proxecto apostou pola integración de xénero, dándolle a Uxía un rol aventureiro fronte a un Brais máis prudente, e pola posta en valor da transmisión interxeracional do coñecemento a través da figura do avó.

Ademais, procurouse unha produción coidada: modelaxe e texturización de personaxes e escenarios baseados en referencias históricas, animación fluída, iluminación cinematográfica e un traballo sonoro meticuloso que incluíu dobraxe profesional, efectos e música envolvente.

A curta conta con subtítulos para garantir a accesibilidade e coa colaboración do antropólogo e historiador Rafael Quintía Pereira, asegurando o rigor histórico. Con este proxecto, O AVÓ PATACAS TEN UNHA MÁQUINA DO TEMPO téntase espertar a curiosidade dos máis pequenos pola historia galega, ofrecéndolles unha experiencia entretida, inmersiva e, sobre todo, en galego.